Det finst fest. Og så finst det Carina Dahl.
Og ja – ho er best på fest.
No kjem ho til Oktoberfest Stryn, og då er det berre å stramme opp snørelivet (eller… kva du no måtte ha på seg) og gjere seg klar. For dette blir ikkje ein sånn “vi tek det litt roleg i kveld”-type konsert.
Nei nei.
Dette er allsang frå første beat.
Dette er dansing før du eigentleg har bestemt deg.
Dette er den kvelden du vaknar dagen etter og tenker: “ka i alle dagar skjedde… og når kan eg gjere det igjen?”
Carina kjem frå Trondheim med kronisk godt humør og ein stå-på-vilje som smittar verre enn forkjølelse i november. Ho har vore i gamet lenge, og dei siste åra har ho vore ein av dei mest strøymde norske artistane som syng på norsk.
Og ho står ganske aleine i sin liga.
Den einaste dama i festmusikk-sjangeren som berre: “flytt dokke, no kjem eg.”
Og det toppa seg med Spellemannpris i 2024 – heilt fortent, spør du oss.
Med låtar som “Best på fest”, “5 shots” og “Har du lyst har du lov”…
…så skjønar du kanskje kvar dette ber.
Og viss du ikkje skjønar det:
Du kjem til å skjøne det ganske fort når teltet kokar.
I 2025 har ho berre køyrt på vidare med hits som “Jentekveld”, “Pickup Truck” og “Cowboyhatten”, og samtidig dansa seg inn i stova til halve Noreg på Skal vi danse.
Men det er ikkje berre fest.
Midt i all energien kjem ho også med låtar som faktisk treff. Litt rolegare. Litt nærare. Så du får puste i sånn… 2 minutt… før det smell igjen.
For éin ting er sikkert:
Når Carina Dahl står på scena i Stryn, så står ikkje du stille nede på golvet.
